*|MC:SUBJECT|*

II ॐ गं गणपतये नमः II

SHREE GANESH YAG PARIWAR

DONATE (click here)

अधिक मास - १६ मे ते १३ जून २०१८

ह्या वर्षी ज्येष्ठ अधिक मास आहे. आपले सण, उपासना, व्रते, हे चांद्र मासा प्रमाणे ठरलेली आहेत. आणि ऋतू सौर मासा प्रमाणे ठरलेले आहेत. काल गणनेचे चंद्राच्या आणि सूर्याच्या गती प्रमाणे चांद्र वर्ष आणि सौर वर्ष असे दोन प्रकार आहेत. आपल्या पूर्वजांनी शास्त्रशुद्ध आणि अचूक पद्धतीने काल गणनेचा अभ्यास केलेला आहे.

चंद्राला पृथ्वी भोवती परिभ्रमण करण्यासाठी एक महिना लागतो. प्रतिपदे पासून अमावस्ये पर्यंत म्हणजे साधारण पणे ३०दिवसांच्या ह्या कालावधीला "चांद्र मास" म्हणतात. ह्या मासांच्या चांद्र वर्षाचे ३५४ दिवस असतात. पृथ्वीला सूर्याभोवती एक परिभ्रमण करायला लागणारा कालावधी म्हणजे "सौर वर्ष" हे वर्ष ३६५ दिवसांचे असते. दर वर्षी दोन्ही वर्षांच्या कालगणने मध्ये ११ दिवसांचा फरक पडतो. प्राचीन शास्त्रकारांनी दोन्ही वर्षातील हा फरक भरून काढण्यासाठी दर ३ वर्षांनी (अचूकपणे सांगायचे तर ३२ महिने १५ दिवसांनी ) एक चांद्र मास अधिक धरावा असे सांगितले आहे. आणि ह्याला पुढील चांद्र मासाचे नाव दिले जाते. ह्या वर्षी "अधिक ज्येष्ठ " मास आहे.पुढे १९ वर्षांनी परत ज्येष्ठ अधिक मास येईल. चैत्र महिन्या पासून अश्विन महिन्या पर्यंत आणि क्वचित प्रसंगी फाल्गुन महिना अधिक येतो. कारण ह्या काळात सूर्याला एका राशीतून दुसऱ्या राशीत जायला ३० दिवसां पेक्षा कमी वेळ लागतो. ह्या अधिक तेराव्या चांद्र मासात सूर्य इतर महिन्यां प्रमाणे एका राशीतून दुसऱ्या राशीत संक्रमण करत नाही. म्हणून ह्या महिन्याला "मलमास" असेही म्हणतात.
तसेच ह्या महिन्याचा स्वामी, उपास्य दैवत भगवान श्रीकृष्ण --श्रीहरि नारायण ---पुरुषोत्तम आहे म्हणून ह्याला "पुरुषोत्तम "मास असेही नाव आहे. ह्या पुण्य-पर्व कालात श्रीकृष्ण भक्तिचे विशेष महत्व आहे.
पूजा-अर्चा, तीर्थ-स्नान, उपासना, दान-धर्म वगैरे रूढी प्रमाणे प्रचलित असणारी कर्मे पुढे उल्लेख केल्या प्रमाणे विशेष भक्तीने केली जातात.
१) अधिक मासात शक्यतो एका वेळेस जेवण करावे. जेवताना मौन पाळावे.
२) दररोज देवासमोर दिवा लावावा. दीप दान करावे.
३) मनाचा निग्रह वाढवण्यासाठी आपल्या आवडत्या वस्तूचा, खाद्य पदार्थाचा त्याग करावा.
४) गायीला "गो-ग्रास" द्यावा.
५) शक्य असेल तर शुद्ध आणि वद्य द्वादशी, पौर्णिमा आणि वद्य अष्टमी, नवमी, चतुर्दशी आणि अमावास्या ह्या तिथीला गरजूंना दान द्यावे.
६) आपल्याकडे विवाहित कन्या आणि जावई हे "लक्ष्मी -नारायण " स्वरूप मानले जातात. म्हणून नारायण स्वरूप जावयाला तेहतीस च्या पटीत अपूप (अनारसे किंवा तत्सम सच्छिद्र/जाळीदार पदार्थ ) दान दिले जाते.
७) अधिक-मास महात्म्य ह्या पद्म -पुराणात उल्लेख असलेल्या पोथीचे दररोज एक अध्याय या प्रमाणे वाचन करावे.
८) देव-पूजा अर्चा झाल्यावर भगवान श्रीकृष्णाला खालील मंत्र म्हणून अर्घ्य द्यावा.

"देव देव महाभाग प्रलयोत्पत्तिकारक । कृष्ण सर्वेश भूतेश जगदानंदकारक । गृहाणार्घ्यंमिमं देव दया कृत्वा ममोपरि।

९)महिनाभर एकाग्रतेने, शुद्ध चित्ताने कुलदेवतेचे, श्रीविष्णू-नारायणाचे नामस्मरण करावे. "ओम नमो भगवते वासुदेवाय " ह्या मंत्राचा जप, विष्णुसहस्र नाम आणि गीता वाचनाचे महत्व आहे. गीता वाचनासोबत गीता सार समजावून घेणे महत्वाचे आहे. गीतेमधील उपनिषदांचे सार सर्वांसाठी, सर्व काळी, सर्व स्थळी मार्गदर्शक आहे. त्यामुळेच भारतात आणि इतरही अनेक देशांमध्ये अनेक भाषांमध्ये गीता तत्वज्ञान आदर्श मानले जात आहे. अधिक मासामध्ये अशा प्रकारे जाणीव पूर्वक केलेल्या साधनेचा शरीर-मनावर होणार परिणाम सकारात्मक होऊ शकतो. मनाची निर्मळता, शरीर-प्रकृतीचे आरोग्य वर्धन सद्-भावनांची जाणीव आणि भूतदया ह्या गोष्टींचा विचार ह्या नियम - पालना मध्ये अभिप्रेत आहे.

गोवर्धनधरं वन्दे गोपालं गोपरुपिणम् | गोकुलोत्सवमीशानम् गोविन्दं गोपिका प्रियं |
भक्तिर्भवती गोविन्दे पुत्रपौत्र विवर्धनी | अकीर्तिक्षय माप्नोति सत्कीर्तिर्वधते चिरम् |

सौ. जयश्री काजरेकर

Our mailing address is:

34 ALEXANDRIA CRESCENT, BRAMPTON, ON, L6T1N3, CANADA

EMAIL : CONTACT@SGYPARIWAR.COM

Want to change how you receive these emails?
You can update your preferences or unsubscribe from this list